1Cor 8 | AOM | STEP | Röhu jö göho na jajivo'ië'e. Övehu avohoromo uvene aho röjahijarue inömohuni mie anoromo aho'o bamëhoruomajeje sisëhuro baeröhego. Sisëni bamëhë'e mi vituoho na jemë ma-dajumo ue'ahore o uvore: Aru'aho sisëni bahijëhë'ego juahovo'ejarëjo. Ëmioho i'irarije o juahovo'irarije di muoho mae jiajoho ëho no uehorovo'ejo. Jemëhu ë'arujëhi aehu uvë'oho: Aru'aho mue bövie bise'e eni ga barëjë'e jevajë uvë'oho ëhuro hesi ihohemu döro bamorovajeje. O aehu ae gö jabesi örire uehorovëvë'oho ëhuro hu ekaresia muoho nigemajeje.

1 Corinthians 8

Aehu inömo sisëni bahijare mi hesi vitu Christian ariböviehu i'iröhe o bogo i'iröhe jö Corinth ariböviehu ua gavamu Paul-hu mana jajivade jöhoje.

1 Röhu jö göho na jajivo'ië'e. Övehu avohoromo uvene aho röjahijarue inömohuni mie anoromo aho'o bamëhoruomajeje sisëhuro baeröhego. Sisëni bamëhë'e mi vituoho na jemë ma-dajumo ue'ahore o uvore: Aru'aho sisëni bahijëhë'ego juahovo'ejarëjo. Ëmioho i'irarije o juahovo'irarije di muoho mae jiajoho ëho no uehorovo'ejo. Jemëhu ë'arujëhi aehu uvë'oho: Aru'aho mue bövie bise'e eni ga barëjë'e jevajë uvë'oho ëhuro hesi ihohemu döro bamorovajeje. O aehu ae gö jabesi örire uehorovëvë'oho ëhuro hu ekaresia muoho nigemajeje. 2 Ja uvë'oho: Na mue eni ga barëjë'e jevajë uvë'iroho ma-döhemu ga'i bogo avoho gavanueje. 3 O jaehu God uehorovë'oho huro ja mae gavajeje.

4 Röhu naehu urimo uëvode jöho inömo sisë hesi mi i'irarije o juahovo'irarije jöho na majëhi'ië'e. Iae no garomo uvarueje: Ëhi jië'e inömoho bëhi rumo'e höjo. God gemu jio'i gö bogohöjo. 5 Iae God-are jö bogo hejë'e ariböviohuro sarerivoromo uvoruomajeje: Ö'idöre jio sa'are jië'e aribövi noehu bogo gëvaruoho uvene aho röjëhi'iröhoho höjo. Iae ëhi jie. Aëro uvarueje: God gö gö aho'obëhe no bogo gavarue darugo'e a masijoho aho'obëhe jio'amajëjo. 6 Röhu Christian aribövioho no bogo ëhioho uehorovo'i God gemu Vavuoho mae uehorovarueje. Huro sa'ae bövie bise'e bamavuë'ëro noro hesi jöhemu uehorovoromo raromo jijiharueje. O Darugo'e A Böröme gemu Iesu Keriso mae uehorovarueje. God-ro uavamu Kerisoro bövie bise'e bamavuadeje. Bamavuoromo ajamuamu no vuovo öroho vuonugo'i darugoho baejë'ëro mae raromarueje.

7 Iae no garomo uvarueje: God gemu A Böröme Keriso gemu ëhi jëvajëjo. Röhu Keriso-are aribövi ioro'ioroho bogo ëhioho gavarueje. A'i urimë'i God-are jö bogo hejare majare uvonövareje: Inöme gö aru'aho'e höromo ëho rajëhinövareje. Majae ëgobövie ëhi ë'obe rovë'ëro ëhu'ëro jabumë inömëni bamëhare mi vitu i'ië'iroho uvoruomajeje: Ëmioho iae aru'aho sisë hesi mie höjo. Ëhi uvoromo ëma ijë'ohuro ëhuro herovoromo uvarueje: Nani no sisë ijaruëromo juhuonivarueje mu öroho bogo avo'avoho gavë'ëro. 8 Jabumë uvarueje: No sisë ijaruëromo juhuonivarueje röhu i ijë'oho bogo ëhuro God-are bëhiroho va'ejo. I juahovë'oho God-are nuniroho bogo sisëho javuo'ë'e. O ijë'oho God-are nuniroho bogo maho javuo'ë'e. 9 Jemë i ijë'oho o juahovë'oho God-ro uvajeje: Ëho jemesi mue höjo. Röhu gavë'i ë mioho ue'ahore. Nani bogo avoho biririvë'e Christian aribövioho jaburo jemë gëromo sisëro rireromo'ë'ö. 10 Ëhesi bëhoho ja iae garomo uvanueje: I ijë'oho o juahovë'oho hesi höjo. Röhu ë jöho Keriso-are ae göëro bogo avoho uehorovë'ëro jië'ëro juhuonivoromo uvo'ë'e: Sisë ariböviohuni bahijare mioho naehu ijë'oho sisë höjo. Nani ë ahuro garöhe jero inömo sisë rajëhijarue osare hiromo ie i'iramu gagorovo uvo'ë'e: Ëaru'aho sisë hesi mi vitu aehu ijë'oho ëho God bijönimajë uvoromo röhu ja gavë'i hu'o ëma i'ë'e. 11 I'iramu ë biriri rumo'e a hesi aru'ahoho sisërë'ë'e. Jasi öhuni Kerisoro uehorovoromo guomadeje. Röhu jero uvaneje: Mi hesi öroho na ga barëjë'e jevajëromo ë a hesi nunire mioho ijamu huro ja gavë'i iromo sisërëjadeje. 12 Ëhi jië'e mu vaejë'oho jemëro jemesi Christian agano jabesi dë vövöbajo'oho biriri rumo'ëro jië'ëro ijumëhoromo jabesi örire sisë vaejëvarujohuro ëhuro Keriso'o sisë vae'a'aruje. 13 Ëhi jië'ego naehu mi ijamu nasi aganehu geromo nasi döre rueromo sisërërovo'ia'amu gavë'oho naro mi ijajoho ioro'iore gemu vuonugo'ejo nasi aganoho sisërëjöëni.